BRGY. CALAMBA GIPASIDUNGAN ISIP “MOST ACTIVE BARANGAY” SA 47TH NATIONAL DISABILITY RIGHTS WEEK
GOLDEN PRINCE HOTEL, JULY 27, 2025 — Gibayaw ang dungog sa Barangay Calamba human kini gipasidungang “Most Active Barangay” atol sa 47th National Disability Rights Week celebration, nga gipahigayon sa Golden Prince Hotel. Ang maong pasidungog usa ka ilhanan sa padayong suporta ug dedikasyon sa barangay alang sa mga Persons with Disabilities (PWDs).
Si Kapitan Ester G. Concha, ang tinubdan sa inspirasyon sa maong kalampusan, gidayeg tungod sa iyang walay puas nga suporta sa tanang kalihokan nga gihimo sa sektor sa PWD sa barangay. Ang iyang liderato nagpasiugda sa aktibong partisipasyon ug pagpaningkamot sa tanang miyembro sa PWD community sa Calamba.
Elsa Dy, ang acting president sa PWD sa Brgy. Calamba, nga aktibo sa pag-organisa sa mga kalihokan ug pagsiguro nga matag miyembro matagan og higayon nga makapakabana ug makapakita sa ilang mga abilidad.
Sa laing bahin, mipatigbabaw usab ang usa ka aktibong miyembro sa PWD nga si Kenzo M. Genon, human makadaog sa Limping Basketball ug Sitting Volleyball atol sa 4th National Disability Rights Week “Para Sports Fest.” Ang iyang kadaugan nagpamatuod sa potensyal ug kusog sa mga PWDs nga mahimong ehemplo sa determinasyon ug kaisog.
Ang selebrasyon dili lang usa ka pagpasidungog, apan usa ka pahimangno nga ang katilingban adunay dakong papel sa pagduso sa katungod, dignidad, ug kahigayunan sa tanang katawhan — ilabina sa mga kabus ug gimahinan.
Sa padayon nga suporta sa liderato sa barangay ug sa aktibong partisipasyon sa mga miyembro sa PWD, nagpabiling baruganan ang Barangay Calamba sa maong pasalig: “Walay Pabilin — PWD Apil!”
