Gipahibalo sa Barangay Calamba, subay sa direktiba sa Syudad sa Cebu nga gipangulohan ni Mayor Nestor Archival, nga ang polisiya nga “No Segregation, No Collection” ubos sa RA 9003 o Ecological Solid Waste Management Act of 2000 opisyal nga ipatuman sugod Enero 16 ning tuiga.
Sumala ni Konsehal Kenner A. Bacurnay, Chairman sa Committee on Environmental and Sanitation, ang Enero 1 hangtod Enero 15 igahatag isip pahimangno ug information drive alang sa tanang residente aron makapangandam ug makat-on sa hustong pagbulag sa basura.
“Sa Enero 1–15, pahimangno ug pag-edukar pa lang sa katawhan. Apan sugod Enero 16, kung walay hustong segregation, dili na kolektahon ang basura,” matud ni Konsehal Bacurnay.
Gisuportahan usab kini ni Barangay Kapitan Ester G. Concha, nga miingon nga ang barangay motuman pag-ayo sa polisiya sa syudad ug nangayo sa bug-os nga kooperasyon sa tanan.
“Hatagan pa nato og higayon ang tanan sa unang 15 ka adlaw, apan kinahanglan na gyud ta magdisiplina aron malimpyo ang atong barangay,” matud sa Kapitan.
Ang tanang konsehal sa barangay mipahayag sa ilang bug-os nga suporta sa maong programa ug nanawagan sa katawhan nga:
- Sundon ang iskedyul sa koleksyon sa basura
- Ibulag og husto ang basura
- Likayan ang pagpagawas og basura kung wala pa ang truck
Ang Barangay Calamba naglaum sa kooperasyon sa tanan alang sa usa ka limpyo, hapsay, ug malinawong komunidad.
#KausabanCalamba
#KapDoki
#KennerBox
