Gipangulohan ni Kapitan Ester G. Concha ang pagpanglimpyo sa barangay pinaagi sa kalihukan nga OPLAN BAKLAS, nga gihimo aron mas mapaambit ang katahum ug kahapsay sa palibot sa komunidad.
Ang maong kalihukan wala magdala ug political agenda, apan usa lamang ka inisyatiba sa pagpanghinlo ug pagpanghipos sa mga daan, gisi, ug wala nay gamit nga mga poster, tarpaulin, ug uban pang butang nga nakaguba sa tan-aw sa barangay.
“Gusto nato nga tan-awon nga limpyo, hapsay, ug nindot ang atong barangay. Dili lang kini para sa eleksyon, kundi para sa atong kahimtang matag adlaw,” matod pa ni Kapitan Ester.
Kauban ang barangay tanod, SK, ug mga Brgy Workers nagsuroy-suroy ang grupo sa mga kadalanan, ug eskinita aron panghipuson ang mga materyales nga sagbot na sa panan-aw.
Nagpasalamat ang kapitan sa mga residente nga misuporta sa kalihukan ug nag-awhag pa sa uban nga magtinabangay sa pagmintinar sa kalimpyo sa palibot.
“Kung limpyo ang palibot, mas malinawon ug mas komportable ang pagpuyo,” dugang pa niya.
Ang OPLAN BAKLAS usa lamang sa daghang programa nga giandam sa liderato ni Kapitan Concha aron ipakita nga ang tinud-anay nga serbisyo publiko makita sa mga yano apan dakong buhat alang sa katawhan.
